एनसेलले ल्यायो ‘एनसेल भोल्टे’ सेवा


एनसेलका ग्राहकले अब स्पष्ट सुनिने हाई डेफिनिसन (एचडी) भ्वाइस कल सेवाबाट फाइदा लिन पाउने भएका छन् ।

एनसेल आजियाटाले आफ्नो भ्वाइस ओभर लङ टर्म इभोलुसन (भोल्टे) सेवा ‘एनसेल भोल्टे’ तीन ब्राण्डका केही मोबाइल सेटबाट व्यवसायिक रूपमा दिन सुरू गरेको छ।

कम्पनीकाअनुसार दूरसञ्चार सेवाका क्षेत्रमा भोल्टे एक नयाँ प्रविधि हो जसले उच्च गुणस्तरको हाई डेफिनिसन र छिटो कनेक्ट हुने भ्वाइस कल सेवा प्रदान गर्दछ । भोल्टेमा फोरजी नेटवर्क प्रयोग गरी गुणस्तरीय भ्वाइस कल गर्न सकिन्छ।

ग्राहकले अब फोरजी नेटवर्कमा रही फोन गर्दा थ्रीजी नेटवर्कमा नझरी हाल लाग्दै आएको सामान्य कल शुल्कमा नै उच्च गुणस्तरको भ्वाइस कलका साथै डेटा सेवाको एकै साथ फाइदा लिन सक्ने बताइएको छ।

भोल्टे सेवाको सफलता पुर्वक सफ्ट लन्च सम्पन्न गरी एनसेलले भदौ १६ गतेदेखि व्यावसायिक रूपमा भोल्टे सेवाको सुरूवात गरेको हो ।

हालको सुरूवाती चरणमा ग्राहकहरुले सामसङका ग्यालेक्सी ए५१, ग्यालेक्सी ए३३ र ग्यालेक्सी ए५३, भिभोको वाई५५, भी२३ र ह्वावेको नोभा ३आई, वाई९ प्राइम २०१९ मा यो भोल्टे सेवा सुरू गरी यसको फाइदा लिन सक्नेछन्।

एनसेलको फोरजी सिम अर्थात यूसिम भएका र माथि उल्लेख गरिएका मोबाइल सेट प्रयोग गर्ने ग्राहकहरुले एस्ट्रिक्स१७२०१ह्यास डायल गरी एनसेल भोल्टे सेवा सुरू गर्न सक्छन्।

यो सेवा सुरू गरेसँगै ग्राहकले एनसेल नेटवर्क भित्र कल गर्न सकिने १०० मिनेट भोल्टे टक टाइम बोनस स्वरुप प्राप्त गर्न योग्य हुन्छन्।

प्राप्त बोनस भोल्टे टक टाइम २८ दिनको लागि मान्य रहन्छ । उल्लेखित मोबाइल सेटहरू प्रयोग गर्ने ग्राहकले मोबाइलको सफ्टवेयरको पछिल्लो संस्करण भने आफ्नो मोबाइलमा इन्स्टल गरेको हुनुपर्ने कम्पनीले जनाएको छ।

व्यावसायिक रूपमा भोल्टे सेवा सञ्चालनमा ल्याइ आफ्ना ग्राहकलाई नयाँ प्रविधिमार्फत यसका लाभ प्रदान गर्न पाएकोमा कम्पनी हर्षित रहेको कम्पनीले जनाएको छ।

यो सेवा देशभर धेरै भन्दा धेरै ग्राहकमाझ पुर्‍याउन भोल्टे चल्ने ब्राण्ड र मोबाइल सेटका मोडलहरू थप गर्दै जाने कम्पनीले जनाएको छ।

एनसेलको फोरजी नेटवर्क उपलब्ध रहेका नेपालभरका सबै एनसेल ग्राहकले भोल्टे सेवाको फाइदा लिन सक्छन् ।

ग्राहकले यो सेवाबाट लाभ लिन आफ्नो भोल्टे चलाउन योग्य मोबाइल सेटमा फोरजी सेटिङ अन गर्नुपर्ने र फोरजी नेटवर्कमा रहेको हुनुपर्ने कम्पनीले जानकारी दिएको छ।


प्रकाशित मिति : २०७९ भाद्र २१, मंगलवार

धेरै पढिएको

ताजा समाचार